पुणे महानगरपालिकेच्या नव्या स्वरुपातील ‘पीएमसी केअर’ प्लॅटफॉर्मचे  उद्घाटन संपन्न…

पुणे :

पुणे महानगरपालिकेच्या नव्या स्वरुपातील ‘पीएमसी केअर’ प्लॅटफॉर्मचे मंगळवार दि. ५ सप्टेंबर रोजी महापालिकेचे अतिरिक्त आयुक्त (ज) रविंद्र बिनवडे आणि पुणे स्मार्ट सिटीचे मुख्य कार्यकारी अधिकारी डॉ. संजय कोलते यांच्या हस्ते उद्घाटन करण्यात आले. पीएमसी केअर
मोबाईल ॲप्लिकेशन व पोर्टल सिटीझन एंगेजमेंट प्लॅटफॉर्म, प्रशासन आणि नागरिक यांना जोडून ठेवण्यासाठी महत्त्वाचा दुवा ठरणार आहे. या कार्यक्रमाला माहिती व तंत्रज्ञान विभागाचे प्रमुख राहुल जगताप, विविध खात्यातील आयटी नोडल ऑफिसर आणि कर्मचारी उपस्थित होते.

यावेळी बोलताना अतिरिक्त आयुक्त (ज) मा. रविंद्र बिनवडे म्हणाले की, “पुणे मनपाचा नव्या रुपातील ‘पीएमसी केअर’ हा एक असा प्लॅफॉर्म आहे, ज्या माध्यमातून पालिका प्रशासन आपली योग्य बाजू नागरिकांपर्यंत पोहोचवू शकेल. प्रत्येक घटनेची तथ्ये जनतेपर्यंत पोहोचवण्यासाठी हा प्लॅटफॉर्म निश्चित मदत करेल. या प्लॅटफॉर्मद्वारे नागरिक ब्लॉग, लेख लिहू शकतील. पालिकेच्या ज्या सेवा-सुविधा आहेत, त्या नागरिकांना सहज उपलब्ध होतील. अशा या परिपूर्ण प्लॅटफॉर्मची माहिती जास्तीत जास्त नागरिकांपर्यंत पोहोचणे गरजेचे आहे. आता १० वेगवेगळे ॲप वापरण्यापेक्षा हे सिंगल ॲप, सिंगल प्लॅटफॉर्म सगळ्यांसाठीच उपयुक्त आहे.”

या प्लॅटफॉर्मद्वारे तक्रार नोंदवणे, ऑनलाईन मिळकत कर भरणा, पाणीपट्टी भरणा, फेरीवाला देयक, जन्म-मृत्यू प्रमाणपत्र, विवाह नोंदणी, विविध प्रमाणपत्रे, NOC, उद्यान तिकीट, निविदा, तसेच विविध परवाने / परवानगी उपलब्ध करून देण्यात येत आहे. तसेच नागरिकांना ब्लॉग्स, लेख, पुणे मनपाद्वारे राबविण्यात येणारे उपक्रम, प्रकल्प, कार्यक्रमांची माहिती व आपल्या आसपासच्या ठिकाणांची माहिती देखील या प्लॅटफॉर्मवरून केवळ एका क्लिकवर मिळणार आहे. तसेच महापालिकेचे कर्मचारी आणि अधिकारी यांच्यासाठी पीएमसी केअर’ प्लॅटफॉर्मद्वारे शासन निर्णय, परिपत्रके, नागरिकांमार्फत प्राप्त तक्रारींवर योग्य ती कार्यवाही करणे, तसेच तक्रार डॅशबोर्ड उपलब्ध करून देण्यात आलेला आहे. अशा प्रकारे नागरिक व पुणे मनपा कर्मचारींना आता एका क्लिकवर सर्व सुविधा मिळणार आहेत.

‘पीएमसी केअर’ प्लॅटफॉर्म लहान मुले, युवा वर्ग, गृहिणी, जॉब प्रोफेशनल्स, ज्येष्ठ मंडळी सर्वांसाठीच उपयुक्त ठरणारा आहे. शिक्षण, मनोरंजन, सिटी अपडेट्स, आरोग्य, फूड अशा विविध क्षेत्रातील सगळी माहिती पुणेकरांना एकाच प्लॅटफॉर्म वर उपलब्ध होणार आहे. असा हा परिपूर्ण सिटीझन एंगेजमेंट प्लॅटफॉर्म आता गूगल प्ले स्टोअर आणि आयओएस ॲप स्टोअरवर उपलब्ध आहे.

नागरिकाभिमुख सेवा प्रदान करणारा, नागरिक व प्रशासन यांना जोडणारा दुवा असणाऱ्या या प्लॅटफॉर्मवर सर्व नागरिक, मनपा कर्मचारी आणि अधिकारी यांनी नोंदणी करावी, असे आवाहन महापालिका प्रशासनातर्फे करण्यात येत आहे. त्यासाठी अँड्रॉइड- https://fxurl.co/rfshd किंवा ios https://fxurl.co/4|JJ123 या लिंकचा वापर करावा. या नोंदणी प्रक्रियेदरम्यान काही शंका किंवा अडचण भासल्यास त्वरित ०२०-६७०५७१४८ या क्रमांकावर संपर्क साधावा.