बाणेर, बालेवाडी, सुस, महाळुंगे मध्ये वाहतूक कोंडीचा महाभीषण राक्षस : नागरिक त्रस्त , प्रशासन सुस्त!

बाणेर :

पुण्याच्या बाणेर आणि बालेवाडी, सुस, महाळुंगे परिसरात वाहतूक कोंडीने रौद्र रूप धारण केले असून, येथील नागरिकांचे जीवन अक्षरशः असह्य झाले आहे. मुख्य रस्त्यांवरून वाहन चालवणे म्हणजे एक प्रकारची शिक्षाच ठरत आहे.

दोन किलोमीटरपर्यंत वाहनांच्या रांगा: महामार्गाचे झाले कोंडवाडा!

मिळालेल्या माहितीनुसार, शुक्रवारी बाणेर-बालेवाडीमधील मुख्य रस्त्यांवर आणि महामार्गावर तब्बल दोन किलोमीटरपर्यंत वाहनांच्या लांबच लांब रांगा लागल्या होत्या. तासनतास एकाच जागी अडकून पडल्याने वाहनचालक आणि प्रवाशांना प्रचंड मनस्ताप सहन करावा लागतो. अनेकांना वेळेवर कार्यालयात पोहोचता येत नाही, तर काहींचे महत्त्वाचे नियोजित कार्यक्रम रद्द करावे लागतात. महामार्ग ट्रॅफिक जाम झाले की सर्विस रस्ते सुद्धा जाम होतात त्याचा परिणाम सुस, महाळुंगे, बालेवाडी, बाणेर परिसराला देखील सहन करावा लागतो. बाणेर फाटा, बालेवाडी हॉस्पिटल चौक, आंबेडकर चौक, भाले चौक, परिहार चौक, राधा चौक, सुस परिसरात शिवबा चौक, तापकीर वस्ती यांसारख्या प्रमुख चौकात तर वाहतुकीचा बोजवारा उडत आहे.

प्रशासनाच्या दुर्लक्षामुळे नागरिकांचे हाल:
स्थानिक नागरिकांचा तीव्र संताप व्यक्त करत आहेत की, वाहतूक कोंडीची ही समस्या काही नवीन नाही. गेल्या अनेक वर्षांपासून ही समस्या गंभीर बनत चालली आहे, परंतु प्रशासनाकडून यावर ठोस उपाययोजना केली जात नाही. वाहतूक पोलीस आणि महानगरपालिका प्रशासन केवळ बघ्याची भूमिका घेत आहे का, असा संतप्त सवाल नागरिक विचारत आहेत. या वाहतूक कोंडीमुळे केवळ वेळेचा अपव्यय होत नाही, तर इंधनाचाही मोठ्या प्रमाणावर अपव्यय होत आहे, शिवाय ध्वनी प्रदूषण आणि वायू प्रदूषण यामुळे नागरिकांचे आरोग्य धोक्यात आले आहे.

काय आहेत प्रमुख कारणे?
* वाढते शहरीकरण आणि वाहनांची संख्या: बाणेर, बालेवाडी परिसरात वाढलेले गृहनिर्माण प्रकल्प आणि नवीन सोसायट्यांमुळे लोकसंख्या मोठ्या प्रमाणात वाढली आहे, परिणामी वाहनांची संख्याही वाढली आहे.
* अपुऱ्या रस्त्यांचे जाळे: वाढत्या लोकसंख्येच्या तुलनेत रस्त्यांचे जाळे अपुरे आहे. रुंदीकरण आवश्यक असलेल्या अनेक रस्त्यांचे काम अर्धवट अवस्थेत आहे.
* सार्वजनिक वाहतुकीचा अभाव: सार्वजनिक वाहतूक व्यवस्थेचा अभाव असल्याने अनेक नागरिक खासगी वाहनांचा वापर करतात, ज्यामुळे रस्त्यांवरील भार वाढतो.
* अतिक्रमण आणि अनधिकृत पार्किंग: रस्त्यांवर झालेले अतिक्रमण आणि अनधिकृत पार्किंगमुळे वाहतुकीसाठी उपलब्ध जागा कमी होते.
* वाहतूक पोलिसांचे नियोजन नाही: वाहतूक पोलिसांचे अपुरे मनुष्यबळ आणि प्रभावी नियोजन नसल्यामुळे कोंडी अधिकच वाढत आहे.

प्रशासनाने तातडीने लक्ष द्यावे:
या गंभीर समस्येवर प्रशासनाने तातडीने लक्ष देऊन प्रभावी उपाययोजना करणे अत्यंत आवश्यक आहे. रस्त्यांचे रुंदीकरण, सार्वजनिक वाहतूक व्यवस्थेत सुधारणा, अनधिकृत पार्किंगवर कठोर कारवाई आणि वाहतूक पोलिसांचे नियोजन अधिक प्रभावी करणे ही काळाची गरज आहे. अन्यथा, बाणेर-बालेवाडी, सुस महाळुंगेतील नागरिकांचे जीवन यामुळे अधिकच कठीण होईल, यात शंका नाही.