बाणेर टेकडी परिसरात पथदिव्यांची सोय, नागरिकांना दिलासा

बाणेर :

बाणेर टेकडी पायथ्याशी असलेल्या वेंटेज सोसायटीसमोरील रस्त्यावर अनेक दिवसांपासून पथदिवे नसल्याने नागरिकांना रात्रीच्या वेळी ये-जा करताना अडचणींचा सामना करावा लागत होता, तसेच भीतीचे वातावरण निर्माण झाले होते. अखेर, माजी नगरसेविका सौ. ज्योती गणेश कळमकर यांच्या पाठपुराव्यामुळे या रस्त्यावरील विद्युत दिवे कार्यान्वित झाले आहेत.

बाणेर टेकडीकडून पाषाणकडे जाणाऱ्या या रस्त्यावर पथदिव्यांची सोय नसल्यामुळे वेंटेज सोसायटीमधील रहिवाशांनी आपली अडचण कळमकर यांच्या निदर्शनास आणली होती. नागरिकांशी संवाद साधल्यानंतर कळमकर यांनी या समस्येचे गांभीर्य ओळखले. त्यांनी तात्काळ पथ विभाग आणि विद्युत विभागाकडे पाठपुरावा करत या रस्त्यावर पथदिवे बसवून ते सुरू करण्यासाठी प्रयत्न केले. त्यांच्या अथक प्रयत्नांना यश आले असून, आज हे पथदिवे कार्यान्वित करण्यात आले आहेत.

पथदिवे सुरू झाल्यामुळे परिसरातील नागरिकांनी, विशेषतः महिला भगिनींनी सौ. ज्योतीताई कळमकर यांचे आभार मानले आहेत. या सुविधेमुळे आता नागरिकांना रात्रीच्या वेळी सुरक्षितपणे ये-जा करता येणार आहे.