किर्लोस्कर कमिन्स एम्प्लॉईज युनियनचा ५२ वा वर्धापनदिन साजरा

पुणे :

किर्लोस्कर कमिन्स एम्प्लॉईज युनियनचा ५२ वा वर्धापनदिन साजरा करण्यात आला. डहाणूकर कॉलनीतील युनियनच्या सभागृहात झालेल्या कार्यक्रमाच्या अध्यक्षस्थानी श्रीकांत खुरपे होते. यावेळी किर्लोस्कर कमिन्स कंपनीचे प्लांट हेड राजेंद्र कुलकर्णी, संचालक (एचआर) अजित तलरेजा, प्रमुख (एचआर) शिवांभर सिंग, युनियनचे अध्यक्ष महेंद्र बालवडकर, उपाध्यक्ष बापू सरोदे, डॉ. दत्ता कोहिनकर आदी उपस्थित होते. सेवानिवृत्त, २५ वर्षे सेवा बाजवलेल्या आणि विशेष प्राविण्य मिळवलेल्या कामगारांचा सत्कार करण्यात आला.

‘कामगार हा कंपनीचा कणा असतो. देशाच्या प्रगतीसाठी उद्योग चालवले जात असतील, तर कामगारांना त्यांचा हक्क मिळाला पाहिजे. कामगार कायद्यांमधील बदल, खाजगीकरण यामुळे कामगार देशोधडीला लागत आहे. अनेक कंपन्या वेतन देताना, करार करताना कामगारांची पिळवणूक करत आहेत. त्यामुळे कामगारांना सशक्त बनवणारे कामगार कायदे आणण्यासाठी प्रयत्नशील आहे,’ असे प्रतिपादन राष्ट्रीय श्रमिक आघाडीचे अध्यक्ष यशवंत भोसले यांनी केले. कामगार चळवळ अधिक सक्षम व्हावी, अशी अपेक्षाही त्यांनी व्यक्त केली

श्रीकांत खुरपे म्हणाले, ‘कामगारांच्या हितासाठी संघटन महत्त्वपूर्ण असते. व्यवस्थापन व कामगार यांच्यात सौहार्द राहावे यासाठी युनियन गरजेची आहे. दोन्ही बाजूनी पारदर्शीपणा व प्रामाणिकपणा जपायला हवा. कामगारांचा आणि कंपनीचा उत्कर्ष झाला पाहिजे. त्यासाठी परस्परांना साथ देण्याची आवश्यकता आहे.’

युनियन अध्यक्ष महेंद्र बालवडकर म्हणाले, ‘वर्धापन दिनानिमित्त रक्तदान व अन्य उपक्रमांचे आयोजन करण्यात आले. ३०७ कामगारांनी रक्तदान केले. सेवानिवृत्त कामगार, सेवेची २५ वर्षे पूर्ण केलेले कामगार व विशेष प्राविण्य मिळवलेल्या कामगारांचा सन्मान करण्यात आला. कामगार व कंपनी यांच्यातील करार लवकरात लवकर व्हावे, यासाठी आम्ही प्रयत्न करत आहोत.’

अधिक तलरेजा म्हणाले, ‘या प्लांटमध्ये चांगले वातावरण आहे. आधुनिकीकरण आले, तरी येथील संस्कृती टिकून आहे. कामगारांमध्ये एकमेकांबद्दल आदर आहे. ६२ वर्षात कंपनीच्या यशात कामगारांचे महत्त्व आहे. युनियनने सामाजिक दायित्व जपले आहे, ही आनंदाची बाब आहे. नवे तंत्र आले तर कामगारांचे महत्त्वाचे कमी होणार नाही.’नीलेश कथोरे यांनी सूत्रसंचालन केले. विजय भिलारे यांनी आभार मानले.