बालेवाडी-बाणेर-पाषाण रहिवासी संघटनेच्या(BBPRA) प्रयत्नांना मोठे यश, मुख्यमंत्री उपमुख्यमंत्र्यांसोबत बैठकीत लवकर तोडगा काढण्याचे प्रशासनाला निर्देश..

बाणेर :

बालेवाडी-बाणेर-पाषाण रहिवासी संघटनेच्या (BBPRA) सदस्यांनी मुख्यमंत्री देवेंद्र फडणवीस आणि उपमुख्यमंत्री अजित पवार यांची भेट घेऊन हिंजवडीला जाणाऱ्या आयटी कर्मचाऱ्यांसह दैनंदिन प्रवाशांना भेडसावणाऱ्या वाहतूक कोंडीच्या समस्येवर तोडगा काढण्याची मागणी केली. मुंबईतील विधान भवन येथे झालेल्या या उच्चस्तरीय बैठकीत, BBPRA च्या मुख्य समिती सदस्य सारंग वाबळे आणि अमेय जगताप यांनी बाणेर-बालेवाडी परिसरातील समस्या मांडल्या. या बैठकीसाठी विशेष निमंत्रित म्हणून BBPRA सदस्यांना निमंत्रित करण्यात आले होते

या बैठकीला मंत्री मधुरताई मिसाळ, आमदार महेशदादा लांडगे, शंकरदादा जगताप आणि शंकर भाऊ मांडेकर यांच्यासह अनेक वरिष्ठ अधिकारी उपस्थित होते. यामध्ये विभाग आयुक्त, जिल्हाधिकारी, PMC आणि PCMC आयुक्त, PMRDA आयुक्त, NHAI आणि मेट्रो प्रतिनिधींचा समावेश होता.

चर्चेत आलेले प्रमुख मुद्दे आणि प्रस्तावित उपाययोजना
BBPRA च्या सदस्यांनी बैठकीत अनेक महत्त्वाचे मुद्दे उपस्थित केले:

* राधा चौक अंडरपासवरील ताण: राधा चौकातील अंडरपास पूर्ण क्षमतेने वापरला जात असल्याने मोठ्या प्रमाणावर वाहतूक कोंडी होत आहे. याशिवाय, हा चौक पुणे पोलीस आणि PCMC या दोन पोलीस विभागांच्या हद्दीत येत असल्याने गर्दीच्या वेळी समन्वयाचा अभाव दिसून येतो.

* प्रलंबित NHAI अंडरपास: राधा चौक आणि भुजबळ चौक (बालेवाडीला जोडणारा) दरम्यान NHAI च्या प्रलंबित अंडरपास प्रकल्पाचा मुद्दा चर्चेत आला. हा प्रकल्प पूर्ण झाल्यास कोंडी कमी होण्याची अपेक्षा आहे.

* बालेवाडी-जगतप डेअरी पूल: बालेवाडीला जगताप डेअरी मार्गे कास्पटे वस्तीशी जोडणाऱ्या या बहुप्रतिक्षित पुलामुळे वाहतूक सुरळीत होण्यास मदत होणार आहे.

मुख्यमंत्र्यांकडून आश्वासने आणि कारवाईचे निर्देश :
मुख्यमंत्री फडणवीस आणि उपमुख्यमंत्री अजित पवार यांनी या समस्यांवर तातडीने लक्ष देण्याचे आश्वासन दिले. त्यांनी अधिकाऱ्यांची चांगलीच कानउघडणी केली. लवकरात लवकर कामे मार्गी लावण्याचे निर्देश दिले.

* बालेवाडी-जगताप डेअरी पूल: या पुलासाठीची रस्तेकामे आणि भूसंपादन प्रक्रिया एका महिन्याच्या आत पूर्ण केली जाईल असे आश्वासन देण्यात आले.

* NHAI ला सूचना: NHAI ला अंडरपासचे काम जलदगतीने पूर्ण करण्याचे आणि सेवा रस्ते टिकाऊ सिमेंट वापरून बांधण्याचे निर्देश देण्यात आले आहेत, जेणेकरून खड्डे पडणार नाहीत आणि वाहतूक अधिक सुरळीत होईल.

या उपाययोजनांच्या प्रगतीवर लक्ष ठेवण्यासाठी नियमित आढावा घेतला जाईल असेही यावेळी स्पष्ट करण्यात आले. या प्रयत्नांमुळे बालेवाडी, बाणेर आणि परिसरातील आयटी कर्मचारी आणि प्रवाशांना मोठा दिलासा मिळण्याची अपेक्षा आहे. मुख्यमंत्री आणि उपमुख्यमंत्री यांनी विशेष लक्ष घातल्याने प्रश्न मार्गी लागणार आहे. या व्यतिरिक्त, हिंजवडी-शिवाजीनगर मेट्रोशी संबंधित अनेक मुद्द्यांवर देखील या बैठकीत चर्चेत आली.