मतदार नोंदणी अभियान: बाणेरमध्ये लोकशाहीच्या बळकटीकरणासाठी सौ पुनम विशाल विधाते यांचा पुढाकार..

बाणेर :

लोकशाहीच्या बळकटीकरणासाठी प्रत्येक नागरिकाचा सहभाग अत्यंत महत्त्वाचा असतो, या विचाराने प्रेरित होऊन बाणेर परिसरात राष्ट्रवादी पुणे शहर महिला काँग्रेसच्या कार्याध्यक्षा सौ पूनम विशाल विधाते यांच्या वतीने एक विशेष मतदार नोंदणी अभियान राबवण्यात आले. बाणेरमधील विविध सोसायट्यांमध्ये हे अभियान यशस्वीरित्या पार पडले, ज्यात नागरिकांनी उत्स्फूर्तपणे सहभाग घेतला.

या अभियानांतर्गत नागरिकांना मतदार नोंदणीच्या ऑनलाईन आणि ऑफलाईन दोन्ही प्रक्रियांबद्दल सविस्तर माहिती देण्यात आली. अनेक नागरिकांनी या संधीचा फायदा घेत आपली नोंदणी केली आणि लोकशाही प्रक्रियेतील आपला सक्रिय सहभाग नोंदवला.

सौ पूनम विशाल विधाते यांनी याप्रसंगी बोलताना सांगितले की, “आपला मतदानाचा अधिकार बजावणे हे प्रत्येक सुजाण नागरिकाचे कर्तव्य आहे. या अभियानाचा उद्देश जास्तीत जास्त नागरिकांना मतदार म्हणून नोंदणी करण्यास प्रोत्साहित करणे आणि लोकशाहीच्या बळकटीकरणात त्यांचे योगदान सुनिश्चित करणे हा आहे.”

या उपक्रमामुळे बाणेर परिसरातील मतदारांमध्ये जनजागृती झाली असून, लोकशाही प्रक्रियेत त्यांचा सहभाग वाढण्यास मदत होणार आहे. ‘आपला मतदानाचा अधिकार नोंदवा, लोकशाही मजबूत करा!’ या संदेशाला नागरिकांकडून चांगला प्रतिसाद मिळाला.