पेरिविंकल इंग्लिश मिडियम स्कूल पिरंगुट शाळेच्या मुलींचा मॅराथॉन स्पर्धेत उत्स्फूर्त सहभाग..

कासार आंबोली :

खेळाडूवृत्तीचे उत्कृष्ट प्रदर्शन करत पिरंगुट येथील पेरिविंकल इंग्लिश मीडियम शाळेच्या मुलींनी राणी लक्ष्मीबाई मुलींची सैनिक शाळा आणि पुणे जिल्हा परिषदेच्या वतीने आयोजित मॅराथॉनमध्ये सहभाग घेतला.

राष्ट्रीय क्रीडा दिन, सेना दिन आणि खाशाबा जाधव जयंतीनिमित्त आयोजित या विशेष स्पर्धेत १२, १४ आणि १७ अशा तीन वयोगटांतील मुलींनी सहभाग नोंदवला. या मॅराथॉनचा उद्देश मुलींमध्ये तंदुरुस्ती, शिस्त आणि क्रीडावृत्ती वाढवणे हा होता.

पेरिविंकल शाळेच्या विद्यार्थिनींनी आत्मविश्वास आणि जिद्दीचे प्रदर्शन करत स्पर्धेत उत्साहाने सहभाग घेतला. स्पर्धेत १९ मुलींनी सहभाग घेतला होता. त्यांचा सहभाग शाळेच्या सर्वांगीण विकासाला प्रोत्साहन देण्याच्या आणि उदयोन्मुख खेळाडूंना घडवण्याच्या वचनबद्धतेला अधोरेखित करणारा ठरला.

विद्यार्थिनींना संस्थापक अध्यक्ष राजेंद्र बांदल, संचालिका रेखा बांदल, शिवानी बांदल आणि यश बांदल यांचे मोलाचे मार्गदर्शन लाभले. तसेच शाळेच्या मुख्याध्यापिका निर्मल पंडित, शाळेतील पर्यवेक्षिका इंदू पाटील माध्यमिक विभाग प्रमुख पूनम पांढरे आणि प्राथमिक विभाग प्रमुख सना इनामदार, पूर्व प्राथमिक विभाग प्रमुख पल्लवी नारखेडे व क्रीडा शिक्षक हनुमंत मणेरे यांनी विद्यार्थिनींना मार्गदर्शन आणि प्रेरणा दिली.