*सूस शाखेत रंगली ‘पेरीविंकलची वारी’; ‘ज्ञानोबा-तुकाराम’च्या जयघोषाने दुमदुमला शाळेचा परिसर*!!!

*आषाढी एकादशीनिमित्त विठ्ठल-रुक्मिणी पूजन व भक्तिमय पालखी सोहळा उत्साहात…*

सुस :

चैतन्य विद्या प्रतिष्ठानच्या पेरीविंकल इंग्लिश मीडियम स्कूल अँड ज्युनिअर कॉलेज, सूस शाखेत आषाढी एकादशीच्या पावन पर्वानिमित्त भक्तिमय वातावरणात विविध धार्मिक व सांस्कृतिक कार्यक्रमांचे आयोजन करण्यात आले. विद्यार्थ्यांनी उत्स्फूर्त सहभाग घेत साकारलेल्या पारंपरिक ‘पेरीविंकलची वारी’ या विशेष पालखी सोहळ्यामुळे संपूर्ण शालेय परिसर ‘ज्ञानोबा-तुकाराम’ आणि ‘विठ्ठल विठ्ठल जय हरी विठ्ठल’ या नामघोषाने दुमदुमून गेला.

महाराष्ट्राच्या समृद्ध वारकरी परंपरेची, संतपरंपरेची आणि भारतीय संस्कृतीची विद्यार्थ्यांना ओळख व्हावी, तसेच भक्ती, समता, सेवा, बंधुभाव आणि मानवतेचा संदेश त्यांच्या मनावर बिंबवावा, या उद्देशाने या विशेष कार्यक्रमाचे आयोजन करण्यात आले होते.

कार्यक्रमाची सुरुवात मंगलमय वातावरणात स्वागतपर भाषणाने झाली. त्यानंतर विद्यार्थ्यांनी पारंपरिक वेशभूषेत साकारलेला आकर्षक पालखी सोहळा आयोजित करण्यात आला. टाळ-मृदंगाच्या गजरात, अभंग आणि भक्तिगीतांच्या सुरात विद्यार्थ्यांनी भक्तिभावाने सहभाग घेतला. विविध पारंपरिक वेशभूषेत सजलेले विद्यार्थी, विठ्ठल-रुक्मिणीच्या भक्तीने भारावलेले वातावरण आणि ‘ज्ञानोबा-तुकाराम’च्या जयघोषाने संपूर्ण परिसराला जणू पंढरीच्या वारीचे स्वरूप प्राप्त झाले.

यानंतर विठ्ठल-रुक्मिणी यांच्या प्रतिमेचे विधिवत पूजन करण्यात आले. आषाढी एकादशीचे धार्मिक, सांस्कृतिक व ऐतिहासिक महत्त्व विद्यार्थ्यांना समजावून सांगण्यात आले. विद्यार्थ्यांनी सादर केलेली भक्तिगीते, अभंग, नृत्याविष्कार आणि सांस्कृतिक कार्यक्रमांनी उपस्थितांची मने जिंकली. विद्यार्थ्यांच्या उत्स्फूर्त सहभागामुळे कार्यक्रमाला विशेष रंगत प्राप्त झाली.

कार्यक्रमाचे प्रभावी सूत्रसंचालन मीना खडतरे यांनी केले. यावेळी संस्थेच्या संचालिका रेखा बांदल, शिवानी बांदल, उपमुख्याध्यापिका सौ. योगिता ढाणे, विभागप्रमुख श्री. सचिन खोडके, समन्वयक सौ. नेहा माळवदे तसेच शिक्षकवृंद उपस्थित होते.

यावेळी मार्गदर्शन करताना पर्यवेक्षिका नेहा माळवदे यांनी विद्यार्थ्यांना संतांच्या शिकवणुकीतून प्रेम, समता, सेवा, सद्भावना आणि भक्तीचा संदेश आत्मसात करून तो आपल्या दैनंदिन जीवनात आचरणात आणण्याचे आवाहन केले. वारकरी परंपरा ही केवळ धार्मिक परंपरा नसून, सामाजिक समता, बंधुभाव आणि मानवतेचा संदेश देणारी समृद्ध सांस्कृतिक परंपरा असल्याचे त्यांनी सांगितले.

संपूर्ण कार्यक्रमाचे आयोजन संस्थेचे संस्थापक अध्यक्ष माननीय श्री. राजेंद्र बांदल, संचालिका सौ. रेखा बांदल, शिवानी बांदल, उपमुख्याध्यापिका सौ. योगिता ढाणे, समन्वयक सौ. नेहा माळवदे तसेच H.O.D. श्री. सचिन खोडके यांच्या मार्गदर्शनाखाली करण्यात आले होते.

या भक्तिमय उपक्रमामुळे विद्यार्थ्यांना महाराष्ट्राची समृद्ध वारकरी परंपरा, संतसाहित्य, अभंगपरंपरा आणि भारतीय संस्कृतीचा अनुभवात्मक परिचय झाला. विद्यार्थ्यांमध्ये भक्तीभाव, सांस्कृतिक जाणीव, सामाजिक समता आणि आपल्या समृद्ध परंपरेविषयी आदर अधिक दृढ झाला.

उत्साहपूर्ण आणि भक्तिमय वातावरणात ‘विठ्ठल विठ्ठल जय हरी विठ्ठल’ या जयघोषाने कार्यक्रमाची सांगता करण्यात आली.