सोमेश्वर फाऊंडेशनचा उपक्रम – पर्यावरणपूरक विसर्जनाला प्रोत्साहन.. परंपरेसोबतच पर्यावरण संवर्धनाचा संदेश

औंध :

औंध परिसरातील बोपोडी महादेव घाट, बोपोडी शांता आपटे घाट, राजीव गांधी घाट, मलिंग घाट तसेच सोमेश्वरवाडी घाट (म.न.पा. शाळा) येथे सोमेश्वर फाऊंडेशनच्या उपक्रमातून कृत्रिम घाटांवर गणेश विसर्जन मोठ्या श्रद्धा, उत्साह व थाटामाटात पार पडले.

सात दिवसांच्या गणेशोत्सवानंतर परिसरातील नागरिक आणि गणेशप्रेमी भक्तांनी परंपरेनुसार बाप्पाचे विसर्जन करताना पर्यावरणपूरक कृत्रिम घाटाचा स्वीकार केला. या उपक्रमात सहभागी झालेल्या प्रत्येक भक्ताचा सोमेश्वर फाऊंडेशनच्या वतीने सन्मानपत्र देऊन गौरव करण्यात आला. या अनोख्या उपक्रमाचे सर्व उपस्थितांनी मनापासून कौतुक केले.

या सोहळ्यात श्रद्धेचा उत्साह तर होता, पण त्याचबरोबर पर्यावरण संवर्धनाचा महत्त्वपूर्ण संदेशही देण्यात आला. “चला, परंपरेला साजरे करताना पर्यावरणाचे रक्षण करूया,” असे आवाहन माजी नगरसेवक सनी विनायक निम्हण यांनी केले.