बाणेर-बालेवाडी पोलिसांच्या सहकार्याने IT Social कडून सायबर सुरक्षा जनजागृती सत्र

बालेवाडी :

वाढत्या सायबर गुन्ह्यांच्या आणि ऑनलाइन आर्थिक फसवणुकीच्या पार्श्वभूमीवर नागरिकांना डिजिटल सुरक्षिततेबाबत जागरूक करण्यासाठी IT Social च्या वतीने बाणेर-बालेवाडी पोलिसांच्या सायबर क्राइम पथकाच्या सहकार्याने सायबर सुरक्षा जनजागृती सत्राचे आयोजन करण्यात आले. शनिवारी (17 ऑक्टोबर) प्राकृती सोसायटीच्या क्लब हाऊसमध्ये हा कार्यक्रम पार पडला.

परिसरातील नागरिकांनी वाढत्या सायबर फसवणुकीबाबत व्यक्त केलेल्या चिंता आणि ऑनलाइन व्यवहार सुरक्षित ठेवण्यासाठी जनजागृती कार्यक्रम आयोजित करण्याची केलेली मागणी लक्षात घेऊन हा उपक्रम राबविण्यात आला.

या सत्रात बाणेर-बालेवाडी पोलीस ठाण्याचे वरिष्ठ पोलीस निरीक्षक चंद्रशेखर सावंत यांनी मार्गदर्शन केले. सायबर गुन्ह्यांचे सध्याचे स्वरूप, ऑनलाइन फसवणुकीचे विविध प्रकार आणि अशा गुन्ह्यांपासून बचाव करण्यासाठी घ्यावयाची खबरदारी याबाबत त्यांनी माहिती दिली. सायबर फसवणुकीला बळी पडल्यास तातडीने योग्य ती पावले उचलण्याचे महत्त्वही यावेळी अधोरेखित करण्यात आले.

विशेषतः ज्येष्ठ नागरिकांना ऑनलाइन फसवणुकीपासून सुरक्षित ठेवणे, संशयास्पद व्यवहार आणि संदेश ओळखणे तसेच सुरक्षित डिजिटल सवयी अंगीकारणे यावर सत्रात भर देण्यात आला. नागरिकांना सायबर धोक्यांची ओळख करून देऊन अशा घटनांना प्रभावीपणे सामोरे जाण्यास सक्षम करणे हा या उपक्रमाचा उद्देश होता.

IT Social च्या वतीने सामाजिक उपक्रम, माहितीची देवाणघेवाण, जनजागृती कार्यक्रम आणि विविध सामाजिक संस्था व शासकीय यंत्रणांच्या सहकार्याने असे उपक्रम राबविले जातात. संस्थेने पहिले वर्ष पूर्ण केले असून, तंत्रज्ञानविषयक जागरूकतेसोबत सामाजिक सहभाग वाढवून अधिक माहितीपूर्ण आणि सुरक्षित समाज घडविण्याचा संस्थेचा प्रयत्न आहे.

इतर गृहनिर्माण सोसायट्यांनीही अशा प्रकारचे जनजागृती कार्यक्रम आयोजित करावेत, असे आवाहन IT Social च्या वतीने करण्यात आले. इच्छुक सोसायट्यांना या उपक्रमासाठी संस्थेचे जगदीप सैनी किंवा संदीप मांडगे यांच्याशी संपर्क साधता येणार आहे.

सायबर सुरक्षा ही सामूहिक जबाबदारी असून, जनजागृती हाच सायबर गुन्ह्यांविरोधातील बचावाचा पहिला टप्पा आहे, हा संदेश या कार्यक्रमातून देण्यात आला.