सुस येथील विद्यार्थ्यांना राहूल बालवडकर, समीर चांदेरे यांच्या वतीने शालेय बॅगचे वाटप..

पुणे:

राज्याचे उपमुख्यमंत्री आणि राष्ट्रवादी काँग्रेसचे नेते अजित पवार यांच्या वाढदिवसानिमित्त राष्ट्रवादी काँग्रेसच्या वतीने विविध सामाजिक उपक्रमांचे आयोजन करण्यात येत आहे. याच उपक्रमाचा एक भाग म्हणून, माजी स्थायी समिती अध्यक्ष बाबुराव चांदेरे यांच्या मार्गदर्शनाखाली पुणे शहर उपाध्यक्ष राहुल बालवडकर आणि पुणे शहर युवक अध्यक्ष समीर चांदेरे यांच्या वतीने सुस येथील पुणे महानगरपालिका मराठी शाळा आणि न्यू इंग्लिश स्कूलच्या विद्यार्थ्यांना शालेय बॅगचे वाटप करण्यात आले.

या कार्यक्रमाला पुणे जिल्हा मध्यवर्ती बँकेचे उपाध्यक्ष सुनील चांदेरे, माजी ग्रामपंचायत सदस्य नितीन चांदेरे, चेअरमन गणेश सुतार, सुखदेव चांदेरे, चंद्रकांत काळभोर, संदीप चांदेरे, विठ्ठल सुतार, प्रभंजन फणसे, तसेच पुणे महानगरपालिका शाळेच्या मुख्याध्यापिका नीता पाटील आणि न्यू इंग्लिश स्कूलचे मुख्याध्यापक विश्वासराव सर आदी मान्यवर उपस्थित होते.

यावेळी बोलताना पुणे जिल्हा मध्यवर्ती बँकेचे उपाध्यक्ष सुनील चांदेरे म्हणाले, “विद्यार्थ्यांना दर्जेदार शिक्षण मिळावे यासाठी त्यांना आवश्यक त्या सर्व सुविधा उपलब्ध करून देणे हे आपले कर्तव्य आहे. अजितदादांच्या वाढदिवसानिमित्त आम्ही हा एक छोटासा प्रयत्न केला आहे, जेणेकरून विद्यार्थ्यांना शिक्षणासाठी प्रोत्साहन मिळेल.”

या उपक्रमामुळे विद्यार्थ्यांना आनंद झाला असून, त्यांच्या चेहऱ्यावर समाधान दिसून आले. राष्ट्रवादी काँग्रेसच्या या सामाजिक उपक्रमाचे सर्वच स्तरांतून कौतुक होत आहे.