हेल्मेट, सिग्नल आणि संयमाचा संदेश; बाणेरमध्ये वाहतूक पोलिसांची जनजागृती

बाणेर :

राष्ट्रीय रस्ता सुरक्षा सप्ताहाच्या अनुषंगाने (११ ते १७ जानेवारी) बाणेर वाहतूक विभाग, पुणे शहर यांच्या वतीने बाणेर रोडवरील सायकर चौक येथे विशेष जनजागृती अभियान राबविण्यात आले. या उपक्रमाअंतर्गत दुचाकीस्वार तसेच इतर वाहनचालकांना सिग्नलवर थांबवून गुलाबपुष्प देत वाहतूक नियमांचे महत्त्व समजावून सांगण्यात आले.

या वेळी बाणेर वाहतूक विभागाचे सहाय्यक पोलीस निरीक्षक श्री. प्रसाद डोंगरे यांच्यासह अंमलदार संदेश दापकेकर, अनिल माने, राम जाधव, निलेश बेडके, सागर बाबरे तसेच वॉर्डन नवनाथ यादगिरे व मुस्तफा चाऊस उपस्थित होते.

राष्ट्रीय रस्ता सुरक्षा सप्ताह हा नागरिकांना वाहतुकीचे नियम पाळण्याबाबत प्रशिक्षित करण्याची आणि रस्ते अपघात कमी करण्यासाठी जागरूकता निर्माण करण्याची महत्त्वाची संधी आहे. याच उद्देशाने या अभियानात नागरिकांना विनाकारण हॉर्न न वाजवणे, सिग्नलचे नियम पाळणे, हेल्मेट घालूनच वाहन चालवणे, वेगावर नियंत्रण ठेवणे, मद्यपान करून वाहन न चालवणे तसेच वाहन चालवताना मोबाईलचा वापर टाळणे याबाबत मार्गदर्शन करण्यात आले.

“डोकं वाचलं तर जीव वाचतो” हा संदेश देत वाहतूक नियम पाळल्यासच अपघातांना प्रतिबंध घालता येईल आणि नागरिकांची सुरक्षितता वाढेल, असे आवाहन यावेळी करण्यात आले. या जनजागृतीमुळे वाहनचालकांमध्ये सकारात्मक प्रतिसाद दिसून आला असून, रस्ते सुरक्षिततेसाठी प्रत्येकाने जबाबदारीने व सावधपणे वाहन चालवावे, असे आवाहन वाहतूक विभागाने केले आहे.