दुसऱ्या आंतरराष्ट्रीय फुले फेस्टिव्हलमध्ये पेरिविंकल शाळेच्या शिक्षिका सौ. मीना खडतरे यांचे प्रभावी काव्य सादरीकरण

पुणे :

देशातील पहिली मुलींची शाळा असलेल्या पुण्यातील भिडेवाडा येथे आंतरराष्ट्रीय काव्य जागर अभियानांतर्गत २ ते ५ जानेवारी २०२६ या कालावधीत आयोजित करण्यात आलेला चार दिवसीय भव्य दुसरा आंतरराष्ट्रीय फुले फेस्टिव्हल – पुणे २०२६ अत्यंत उत्साहात पार पडला.

फुलेप्रेमी व संविधानदूत विजय वडवेराव यांच्या संकल्पनेतून साकारलेल्या या फेस्टिव्हलला देशातील किमान दहा राज्यांतील तसेच परदेशातील शेकडो फुलेप्रेमी कवी-कवयित्रींची उपस्थिती लाभली. सामाजिक प्रबोधन, स्त्रीशिक्षण, समता आणि संविधान मूल्यांचा जागर करणारा हा महोत्सव ठरला.

२ जानेवारी रोजी भारतीय संविधानाला अभिवादन करत अत्यंत भव्य, दिव्य व नयनरम्य उद्घाटन सोहळ्याने फेस्टिव्हलची सुरुवात झाली. ३ जानेवारी रोजी क्रांतीज्योती सावित्रीबाई फुले जयंतीनिमित्त एकाच रंगाच्या साडीत सावित्रीआईंच्या वेशात शेकडो कवयित्रींच्या उपस्थितीत जयंती सोहळा साजरा करण्यात आला. या ऐतिहासिक व प्रेरणादायी दृश्याने उपस्थितांचे डोळे अक्षरशः भरून आले.

या फेस्टिव्हलमध्ये पेरिविंकल इंग्लिश मीडियम स्कूल व ज्युनिअर कॉलेजच्या शिक्षिका सौ. मीना सुधीर खडतरे यांनी “पेटली क्रांतीची ज्योत” हे प्रभावी काव्य सादर करून उपस्थितांची मने जिंकली. त्यांच्या सशक्त आशय, प्रभावी मांडणी व भावस्पर्शी सादरीकरणाची दखल घेत त्यांना अध्यक्षपदाचा सन्मान देण्यात आला.

सन्मानप्रसंगी सौ. मीना खडतरे यांना संविधान ग्रंथ, सन्मानचिन्ह, शेला, संविधान लेखन पॅड तसेच हिरवी साडी देऊन गौरविण्यात आले.

चारही दिवस सकाळी ९ ते रात्री ९ या वेळेत काव्य महोत्सवाची विविध सत्रे पार पडली. दररोज किमान दहा लॉट्समध्ये शंभरहून अधिक कवी-कवयित्रींनी आपली काव्य सादरीकरणे केली. फुले विचारांचा जागर करणारा हा फेस्टिव्हल उपस्थितांसाठी प्रेरणादायी ठरला.