प्रमोद निम्हण यांना उमेदवारी नाकारल्याने पाषाण–सोमेश्वरवाडी–सुतारवाडी भागात कडकडीत बंद

पाषाण :

पुणे महानगरपालिका निवडणूक २०२६ च्या पार्श्वभूमीवर राष्ट्रवादी काँग्रेस पक्षाकडून प्रमोद निम्हण यांना उमेदवारी नाकारण्यात आल्याच्या निषेधार्थ पाषाण, सोमेश्वरवाडी व सुतारवाडी परिसरातील व्यापारी व नागरिकांनी आज कडकडीत बंद पाळला. सकाळपासूनच या परिसरातील बहुतांश दुकाने, आस्थापना व व्यावसायिक गाळे बंद ठेवण्यात आले होते. परंतू माजी नगरसेवक प्रमोद निम्हण यांना समजताच त्यांनी नागरिकांना आणि व्यापाऱ्याना नुकसान होऊ नये त्रास होऊ नये म्हणून त्वरित दुकाने चालू करा असे आवाहन केले.

माजी नगरसेवक प्रमोद निम्हण हे गेल्या अनेक वर्षांपासून या भागात सामाजिक, शैक्षणिक व विकासकामांत सक्रिय असून स्थानिक नागरिकांमध्ये त्यांचा मोठा जनाधार आहे. मात्र, राष्ट्रवादी काँग्रेस पक्षाने प्रमोद निम्हण यांना इच्छुक असलेल्या ओबीसी वर्गातून उमेदवारी न देता माजी नगरसेवक बाबुराव चांदेरे यांना उमेदवारी दिल्याने नागरिकांमध्ये तीव्र नाराजी पसरली आहे.

या निर्णयाच्या विरोधात व्यापारी संघटना, स्थानिक व्यावसायिक व नागरिकांनी एकत्र येत शांततामय मार्गाने निषेध व्यक्त केला. “लोकप्रिय व कार्यकर्तृत्व असलेल्या नेत्याला डावलणे अन्यायकारक आहे,” अशी भावना बंदमध्ये सहभागी झालेल्या व्यापाऱ्यांनी व्यक्त केली.

बंद दरम्यान परिसरातील रस्त्यांवर शुकशुकाट पाहायला मिळाला. वाहतूक तुरळक प्रमाणात सुरू होती, मात्र दैनंदिन व्यवहार पूर्णतः ठप्प झाले होते. नागरिकांनी कोणताही अनुचित प्रकार न घडवता शांततेत बंद पाळत आपला रोष नोंदवला.