प्रभाग क्रमांक ९ मध्ये भाजपकडून उमेदवारी नाकारल्याने सौ. लक्ष्मी सचिन दळवी अपक्ष म्हणून मैदानात, पाषाण परिसरात भाजप पक्षाला धक्का

पाषाण :

भाजपा कोथरूड विधानसभा उत्तर मंडलचे सरचिटणीस सचिन दळवी यांच्या पत्नी सौ. लक्ष्मी सचिन दळवी यांना प्रभाग क्रमांक ९ मधील सर्वसाधारण महिला प्रवर्गातून इच्छुक असूनही भाजपकडून उमेदवारी नाकारण्यात आली. या निर्णयामुळे पक्षांतर्गत नाराजी व्यक्त होत असून, सोमेश्वरवाडी, पाषाण, सुतारवाडी, बाणेर, बालेवाडी, सुस व महाळुंगे परिसरातील नागरिक व कार्यकर्त्यांच्या आग्रहानंतर सौ. लक्ष्मी दळवी यांनी अपक्ष महिला उमेदवार म्हणून निवडणूक लढवण्याचा निर्णय घेतला आहे.

सौ. लक्ष्मी दळवी यांनी कोणतेही राजकीय पाठबळ नसताना केवळ नागरिक व कार्यकर्त्यांच्या विश्वासावर निवडणूक रिंगणात उतरण्याचा निर्धार केला आहे. गेल्या अनेक वर्षांपासून भाजप पक्षवाढीसाठी त्यांनी आणि त्यांच्या कुटुंबाने महत्त्वपूर्ण योगदान दिले असून, लोकसभा व विधानसभा निवडणुकांमध्ये पक्षाला चांगले मताधिक्य मिळवून देण्यासाठी त्यांनी सक्रिय सहभाग नोंदवला आहे.

तथापि, इतक्या प्रदीर्घ काळातील कामगिरीची दखल न घेता निष्क्रिय उमेदवार देण्यात आल्याने पक्षातील निष्ठावंत कार्यकर्त्यांमध्ये तीव्र असंतोष निर्माण झाला आहे. “सर्वसामान्य नागरिकांचा सेवक म्हणून काम करणाऱ्या आणि पक्षासाठी अतोनात मेहनत घेणाऱ्या कार्यकर्त्याला संधी न दिल्याने भाजपने स्वतःच पायावर धोंडा मारून घेतला आहे,” अशी चर्चा पाषाण परिसरात सुरू आहे.

या घडामोडींमुळे प्रभाग क्रमांक ९ मध्ये भाजपला आणखी एक मोठा धक्का बसण्याची शक्यता असून, सौ. लक्ष्मी सचिन दळवी यांच्या अपक्ष उमेदवारीमुळे निवडणुकीत चुरस वाढणार असल्याचे चित्र सध्या दिसून येत आहे.