बालेवाडीत काँग्रेसकडून उमेदवारी अर्जानंतर संदिप बालवडकर यांची भव्य रॅली; नागरिकांचा उत्स्फूर्त प्रतिसाद

बाणेर :

पुणे महानगरपालिकेच्या आगामी निवडणुकीच्या पार्श्वभूमीवर प्रभाग क्रमांक ९ अंतर्गत येणाऱ्या बालेवाडी, बाणेर, म्हाळुंगे, सुस, पाषाण, सुतारवाडी व सोमेश्वरवाडी परिसरातील बालेवाडी येथे भारतीय राष्ट्रीय काँग्रेस पक्षाच्या वतीने संदीप धारुजी बालवडकर यांनी उमेदवारी अर्ज दाखल केला. त्यानंतर नागरिकांच्या उत्स्फूर्त सहभागात भव्य रॅलीचे आयोजन करण्यात आले.

या रॅलीला नागरिकांचा मोठा प्रतिसाद लाभला. विविध भागांतून मोठ्या संख्येने नागरिक, युवक, महिला आणि काँग्रेसचे कार्यकर्ते सहभागी झाले होते. कार्यकर्त्यांचा उत्साह, घोषणांचा गजर आणि परिवर्तनाची सकारात्मक ऊर्जा यामुळे संपूर्ण परिसर भारावून गेला होता.

यावेळी बोलताना संदीप धारुजी बालवडकर यांनी विकासाभिमुख धोरण, पारदर्शक व लोकाभिमुख कारभार तसेच सर्वसामान्य नागरिकांच्या दैनंदिन प्रश्नांसाठी सातत्याने संघर्ष करण्याची भूमिका स्पष्ट केली. “ही लढाई सत्तेसाठी नसून जनतेच्या विश्वासासाठी आहे. नागरिकांचा मिळणारा पाठिंबा हा परिवर्तनाचा संदेश देणारा असून या विश्वासावर निश्चितच विजय मिळेल,” असा आत्मविश्वास त्यांनी व्यक्त केला.