न्यू इंग्लिश स्कूल, सुसगाव — सुरक्षा व्यवस्थेचा नवा टप्पा! प्रमोद निम्हण यांच्या वतीने सीसीटीव्ही कॅमेऱ्यांचे लोकार्पण..

सुसगाव :

न्यू इंग्लिश स्कूल सुसगाव येथे विद्यार्थ्यांच्या सुरक्षेला प्राधान्य देत अत्याधुनिक सीसीटीव्ही कॅमेरे बसविण्यात आले आहेत. माजी नगरसेवक पुणे मनपा मा. प्रमोद आण्णा निम्हण यांच्या पुढाकारातून हा महत्त्वपूर्ण उपक्रम राबविण्यात आला. या सीसीटीव्ही प्रणालीच्या लोकार्पणाचा सोहळा आमदार शंकर भाऊ मांडेकर यांच्या शुभहस्ते संपन्न झाला.

या प्रसंगी आमदार शंकर भाऊ यांनी शाळेची पाहणी करून विद्यार्थ्यांच्या शैक्षणिक गरजा, उपलब्ध सुविधा आणि स्थानिक समस्या जाणून घेतल्या. विद्यार्थ्यांची सुरक्षितता आणि शैक्षणिक प्रगती हेच आपले सर्वोच्च ध्येय असल्याचे त्यांनी यावेळी सांगितले.

“सुसगावातील शैक्षणिक वातावरण अधिक सुरक्षित आणि सक्षम करण्यासाठी आम्ही कटिबद्ध आहोत. समाजहितासाठी असे उपयुक्त उपक्रम यापुढेही राबविले जातील,” असे आमदार शंकर भाऊ मांडेकर यांनी नमूद केले.

स्थानिक पातळीवरील या उपक्रमाचे उपस्थित मान्यवरांनी कौतुक केले असून, सीसीटीव्ही कॅमेऱ्यांमुळे विद्यार्थ्यांच्या सुरक्षेत मोठी भर पडणार आहे.