सोमेश्वरवाडी येथे श्री विठ्ठल-रुक्मिणी मंदिर ट्रस्टच्या वतीने बहुउद्देशीय प्रकल्पांच्या बांधकामाचे भूमिपूजन उत्साहात संपन्न..

सोमेश्वरवाडी :

सोमेश्वरवाडी येथे श्री विठ्ठल-रुक्मिणी मंदिर ट्रस्टच्या वतीने सामाजिक बांधिलकीचा वारसा जपत, युवक आणि नागरिकांसाठी अत्यावश्यक ठरणाऱ्या बहुउद्देशीय प्रकल्पांच्या बांधकामाचे भूमिपूजन अत्यंत मंगल वातावरणात पार पडले. वीर हनुमान तालीम, ज्येष्ठ नागरिकांसाठी विरंगुळा केंद्र, सार्वजनिक ग्रंथालय आणि अभ्यासिका या महत्त्वपूर्ण सुविधांच्या उभारणीमुळे गावाच्या सर्वांगीण विकासाला नवे परिमाण लाभणार आहे.

या शुभकार्याचे भूमिपूजन महाराष्ट्राचे कॅबिनेट मंत्री मा. चंद्रकांतदादा पाटील आणि भोर–राजगड–मुळशी मतदारसंघाचे आमदार मा. शंकरभाऊ मांडेकर यांच्या शुभहस्ते संपन्न झाले. पंचक्रोशीतील मान्यवर पदाधिकारी, जनप्रतिनिधी, स्थानिक नेते, कार्यकर्ते आणि सोमेश्वरवाडीतील ग्रामस्थ मोठ्या संख्येने उपस्थित राहून या उपक्रमाला उत्स्फूर्त प्रतिसाद दिला.

नवीन प्रकल्पांमुळे गावातील युवकांना खेळ, स्पर्धा व शारीरिक सुदृढतेसाठी योग्य सुविधांनी युक्त स्थिर मंच प्राप्त होणार आहे. ज्येष्ठ नागरिकांसाठी विरंगुळा केंद्र हे सुरक्षित संवाद आणि सामाजिक सहभागाचे महत्त्वपूर्ण ठिकाण ठरणार असून, अभ्यासिका व सार्वजनिक ग्रंथालयामुळे विद्यार्थ्यांसाठी अध्ययन, संशोधन आणि ज्ञानार्जनाच्या नव्या संधी निर्माण होणार आहेत.

या उपक्रमाद्वारे सोमेश्वरवाडी गाव विकास, संस्कृती आणि सामाजिक सलोखा यांचा सुंदर मिलाफ साधत एक आदर्श ग्रामीण प्रगतीचा मार्ग दाखवत आहे.