बाणेर गावठाण परिसरातील ड्रेनेज समस्येबाबत जयेश मुरकुटे यांनी सहाय्यक आयुक्तांची घेतली भेट

बाणेर :

बाणेर गावठाण परिसरातील नागरिकांना भेडसावत असलेल्या ड्रेनेज व मलनिस्सारण समस्यांबाबत राष्ट्रवादी काँग्रेस शरद पवार पक्षाचे कोथरूड विधानसभा कार्याध्यक्ष जयेश मुरकुटे यांनी औंध क्षेत्रीय कार्यालयात सहाय्यक आयुक्त मा. गिरीश दापकेकर साहेब यांची भेट घेऊन तातडीने उपाययोजना करण्याचे निवेदन दिले.

बाणेरमधील कटके विद्यालयाजवळून बाणेश्वर मंदिर व भैरवनाथ मंदिराकडे जाणाऱ्या रस्त्यावर अनेक ठिकाणी ड्रेनेज लाईन वारंवार तुंबते. त्यामुळे सांडपाणी रस्त्यावर ओसंडून वाहत असून परिसरात अस्वच्छता व आरोग्यविषयक अडचणी निर्माण होत आहेत.

या मार्गावर दररोज तसेच धार्मिक सणांच्या काळात हजारो भाविक बाणेश्वर आणि भैरवनाथ मंदिरात दर्शनासाठी येतात, मात्र सांडपाण्याच्या समस्येमुळे त्यांना मोठ्या गैरसोयीचा सामना करावा लागतो.

या पार्श्वभूमीवर मुरकुटे यांनी सदर ड्रेनेज लाईन तातडीने बदलण्याची व दुरुस्ती करण्याची मागणी निवेदनाद्वारे केली. या भेटीप्रसंगी परिसरातील स्थानिक नागरिक आणि सहकारीही उपस्थित होते.