बाणेर येथील ननवरे चौकातील प्रलंबित रस्त्याच्या कामाला सुरुवात

बाणेर  :

बाणेर परिसरातील ननवरे चौकाला जोडणाऱ्या १०० मीटर डीपी रस्त्याचे काम अर्धवट राहिल्याने स्थानिक नागरिकांना गेल्या काही महिन्यांपासून मोठ्या गैरसोयींना सामोरे जावे लागत होते. या अपूर्ण कामामुळे वाहनचालकांना बिटवाईज चौकातून मोठा वळसा घ्यावा लागत होता, परिणामी वाहतूक कोंडीची समस्या तीव्र झाली होती.

या संदर्भात स्थानिक सोसायट्यांच्या वतीने १७ मे रोजी स्थायी समिती अध्यक्ष मा. बाबुरावजी चांदेरे यांच्या मार्गदर्शनाखाली मा. उपमुख्यमंत्री अजितदादा पवार यांच्याकडे मागणी करण्यात आली होती. त्यानंतर ८ जुलै रोजी पुणे महापालिकेचे आयुक्त मा. नवल किशोर राम यांच्यासोबत याबाबत चर्चा झाली, तर १२ जुलै रोजी मनपा अधिकाऱ्यांसह स्थळ पाहणीही पार पडली.

या पाठपुराव्यानंतर अखेर आजपासून ननवरे चौकातील प्रलंबित रस्त्याच्या कामाला प्रत्यक्ष सुरुवात झाली आहे. यामुळे परिसरातील नागरिकांना दिलासा मिळणार असून, वाहतूक कोंडीच्या समस्येत मोठ्या प्रमाणात घट होणार आहे.

स्थानिक नागरिकांनी या निर्णयाचे स्वागत करत मनपा प्रशासन व जनप्रतिनिधींप्रती कृतज्ञता व्यक्त केली आहे.