बाणेर येथे गणेशोत्सवाच्या स्वागतासाठी जयेश मुरकुटे सोशल फाउंडेशनतर्फे आयोजित “पर्यावरणपूरक गणपती बाप्पा मूर्ती कार्यशाळा” उत्साहात संपन्न..

बाणेर :

गणेशोत्सवाच्या निमित्ताने जयेश मुरकुटे सोशल फाउंडेशन आयोजित “पर्यावरणपूरक गणपती बाप्पा मूर्ती कार्यशाळा” लहान मुलांच्या आणि पालकांच्या उपस्थितीत मोठ्या उत्साहाने माऊली गार्डन, बाणेर येथे पार पडली.

या कार्यशाळेत लहान मुलांनी मोठ्या आनंदाने सहभाग घेतला. शाडू मातीकामाच्या माध्यमातून मुलांनी स्वतःहून गणेशमूर्ती तयार केली. आपल्या हातांनी घडवलेला बाप्पा आम्ही घरी बसवणार असल्याची आनंदाने भावना मुलांनी व्यक्त केली. मुलांच्या या आनंदात पालकांनीही सहभागी होत कार्यशाळेचा आस्वाद घेतला.

या उपक्रमाबाबत आयोजक जयेश मुरकुटे म्हणाले की, “गणेशोत्सव हा आपल्या संस्कृतीचा आत्मा आहे. मात्र सण साजरा करताना पर्यावरणाची जपणूक होणे तितकेच महत्त्वाचे आहे. त्यामुळेच आम्ही ही कार्यशाळा आयोजित केली. आपल्या हातांनी बनवलेली मूर्ती ही फक्त एक कला नाही तर पर्यावरणपूरकतेचा संदेश आहे.”

या उपक्रमामुळे बाणेर परिसरात उत्सवाच्या उत्साहाबरोबरच पर्यावरणपूरक गणेशोत्सवाचा संदेशही पोहोचला.