अखिल बालेवाडी शिवजयंती उत्सव उत्साहात संपन्न….

बालेवाडी :

अखिल बालेवाडी शिवजयंती उत्सव मोठ्या उत्साहात आणि जल्लोषात संपन्न झाला. संपूर्ण बालेवाडी परिसर छत्रपती शिवाजी महाराजांच्या जयघोषांनी दणाणून गेला. उत्सवाची सुरुवात पहाटे शिवज्योत आणि भव्य मोटारसायकल रॅलीने झाली. सकाळी ७.३० वाजता श्री शिवछत्रपती क्रीडा नगरी, महाळुंगे बालेवाडी येथून ही रॅली निघाली आणि संपूर्ण परिसर शिवमय झाला. त्यानंतर शिवजन्मोत्सव सोहळ्यात मूर्तीपूजन मोठ्या भक्तिभावाने पार पडले.

शिवजयंती निमित्ताने राहुलदादा बालवडकर यांच्या वतीने महाराष्ट्र केसरी पैलवान पृथ्वीराज मोहोळ यांचा पोलीस निरीक्षक नवनाथ जगताप यांच्या हस्ते सत्कार करण्यात आला.

सकाळी शिव आरती व शिववंदनेने वातावरण भक्तिमय झाले. त्यानंतर विठ्ठल-रुक्मिणी मंदिर, बालेवाडी येथे रक्तदान शिबिराचे आयोजन करण्यात आले. या शिबिराला नागरिकांचा उत्स्फूर्त प्रतिसाद लाभला. सायंकाळी ६ वाजता भव्य मिरवणुकीने संपूर्ण बालेवाडी दुमदुमून गेले. पारंपरिक ढोल-ताशा पथके, लेझीम पथक, मर्दानी खेळ आणि घोडेस्वारांसह काढण्यात आलेली ही मिरवणूक लक्षवेधी ठरली. रात्री बालेवाडी गावठाण येथे महाआरतीने सोहळ्याची सांगता झाली.

या भव्य सोहळ्यात स्थानिक नागरिक, शिवप्रेमी आणि विविध मान्यवरांनी मोठ्या संख्येने हजेरी लावली. संपूर्ण कार्यक्रम अत्यंत शिस्तबद्ध आणि उत्साही वातावरणात पार पडला. शिवरायांचे विचार आणि पराक्रम नव्या पिढीपर्यंत पोहोचवण्याचा उद्देश या सोहळ्यातून सफल झाला.