बाणेर-बालेवाडी मेडिको असोसिएशनचा स्पोर्ट्स डे उत्साहात संपन्न..

बाणेर :

बाणेर-बालेवाडी मेडिको असोसिएशनच्या वतीने स्पोर्ट्स डे २ फेब्रुवारी रोजी मोठ्या जल्लोषात पार पडला. या स्पर्धांमध्ये बॅडमिंटन, टेबल टेनिस, कॅरम, बुद्धिबळ आणि क्रिकेट यांसारख्या खेळांचा समावेश होता. संजय स्पोर्ट्स क्लब, पाषाण येथे या स्पर्धांचे आयोजन करण्यात आले होते. १६० हून अधिक डॉक्टर्स यांनी विविध खेळांमध्ये सहभाग घेतला. काही स्पर्धांचे आयोजन १ फेब्रुवारी रोजी करण्यात आले होते.

उद्घाटन आणि प्रमुख उपस्थिती

२ फेब्रुवारी रोजी स्पोर्ट्स डेचे उद्घाटन भाजपा पुणे शहर सरचिटणीस गणेश कळमकर, युरोकुल हॉस्पिटलचे संचालक जगप्रसिद्धयुरो सर्जन डॉ. संजय कुलकर्णी आणि मणिपाल हॉस्पिटलचे प्रमुख श्री आनंद मोटे यांच्या हस्ते करण्यात आले. या कार्यक्रमाला अनेक मान्यवर डॉक्टर आणि वैद्यकीय क्षेत्रातील मान्यवर उपस्थित होते.

क्रिकेट प्रीमियर लीगमध्ये उमराजी हॉस्पिटलचे वर्चस्व

क्रिकेट प्रीमियर लीगच्या सामन्यांना प्रेक्षकांचा उत्स्फूर्त प्रतिसाद मिळाला. सर्वच सामने अतिशय चुरशीचे झाले. अंतिम सामन्यात उमराजी हॉस्पिटलच्या संघाने विजेतेपद पटकावले, तर डॉ. सूरज चव्हाण यांचे व्हिस्डम हॉस्पिटल, बाणेर हे उपविजेते ठरले. याशिवाय, डॉ. जयदीप पालवदे यांची बेनिकेअर हॉस्पिटल टीम, डॉ. शैलेश हातगावकर यांची एशियन स्वाइन टीम, डॉ. प्रसाद बिवरे यांची मणिपाल हॉस्पिटल टीम आणि डॉ. अभिजीत साबळे यांच्या पुणे नेत्रालय टीमने देखील उत्कृष्ट खेळाचे प्रदर्शन केले.

इतर स्पर्धांमध्ये उत्स्फूर्त सहभाग
• टेबल टेनिस स्पर्धेत डॉ. राहुल कोठारी विजेता ठरले.
• डॉ. रितू लोखंडे यांना क्रिकेटमध्ये विशेष महिला खेळाडूचा पुरस्कार मिळाला.
• याशिवाय, बॅडमिंटन, कॅरम, बुद्धिबळ यांसारख्या खेळांमध्ये स्पर्धकांनी आपली सर्वोत्तम कामगिरी केली.

कुटुंबियांसाठी फन गेम्स आणि विशेष कार्यक्रम

डॉक्टरांच्या कुटुंबीयांसाठी फन गेम्सचे आयोजन करण्यात आले होते, ज्यामुळे या स्पोर्ट्स डेला संपूर्ण कुटुंबासाठी आनंददायी अनुभव मिळाला. तसेच, भारतीय पारंपरिक खेळांचे महत्त्व अधोरेखित करण्यासाठी केरळच्या ‘कलरीपयट्टू’ या प्राचीन मार्शल आर्टचे प्रात्यक्षिक आयोजित करण्यात आले. या प्रदर्शनाने उपस्थितांना भारावून टाकले.

बक्षीस वितरण आणि मान्यवरांचे मार्गदर्शन

स्पर्धेतील विजेत्यांना पद्मश्री डॉ. विजयकुमार डोंगरे आणि राष्ट्रवादी काँग्रेसचे पुणे शहर उपाध्यक्ष राहुलदादा बालवडकर यांच्या हस्ते पारितोषिके देण्यात आली. प्रमुख पाहुणे डॉ. विजयकुमार डोंगरे यांनी आरोग्य, व्यायाम आणि फिटनेस यांचे महत्त्व समजावून सांगत, डॉक्टरांनी स्वतःच्या आरोग्याकडेही लक्ष द्यावे, असा संदेश दिला.

संघटन समितीचे मोलाचे योगदान

हा भव्य सोहळा यशस्वी करण्यासाठी बाणेर-बालेवाडी मेडिको असोसिएशनचे संस्थापक अध्यक्ष डॉ. राजेश देशपांडे, डॉ. प्रिया देशपांडे, अध्यक्ष डॉ. कविता चौधरी, सेक्रेटरी डॉ. सुषमा जाधव, डॉ. बबन साळवे आणि डॉ. सागर सुपेकर यांनी विशेष मेहनत घेतली.

स्पोर्ट्स डेच्या आयोजनासाठी कमिटी चेअरमन डॉ. अमोल जामखंडे, डॉ. नारायण जेठवाणी आणि डॉ. प्रणव राडकर यांनी महत्त्वपूर्ण भूमिका बजावली.