“हा फ्लायओव्हर नाही, हा तर ‘FLAW-OVER’!” नगरसेवक सनी निम्हण आक्रमक; PMRDA प्रशासनाचे वाभाडे

पुणे: 

विद्यापीठ चौकातील वाहतूक कोंडी फोडण्यासाठी कोट्यवधी रुपये खर्चून उभारलेले उड्डाणपूल सध्या पुणेकरांसाठी सोयीपेक्षा डोकेदुखीच जास्त ठरत आहेत. PMRDA ने (पुणे महानगर प्रदेश विकास प्राधिकरण) विकसित केलेल्या विद्यापीठ चौकातील फ्लायओव्हरच्या निकृष्ट नियोजनावर नगरसेवक सनी निम्हण यांनी पुन्हा एकदा कडक शब्दांत ताशेरे ओढले आहेत. “हा फ्लायओव्हर नसून प्रॉपर ‘फ्लॉ-ओव्हर’ (नियोजनातील चूक) आहे,” अशा शब्दांत त्यांनी प्रशासनाचा निषेध केला आहे.

नेमका प्रकार काय?

पावसाचे पाणी किंवा रस्ते धुतल्यानंतरचे पाणी ड्रेनेज पाईपद्वारे खाली जाणे अपेक्षित असताना, या उड्डाणपुलावरून पाणी थेट खालून जाणाऱ्या गाड्यांवर आणि पादचाऱ्यांवर पडत आहे. यामुळे दुचाकीस्वारांचे संतुलन बिघडून अपघात होण्याची दाट शक्यता निर्माण झाली आहे.

प्रशासनाचा ‘आठ दिवसांचा’ वायदा फोल

उड्डाणपुलाच्या गंभीर समस्येबाबत सनी निम्हण यांनी यापूर्वीच जाब विचारला होता. त्यावेळी प्रशासनाने “येत्या आठ दिवसांत यात सुधारणा करू” असे आश्वासन दिले होते. मात्र, पंधरा दिवस उलटूनही परिस्थिती ‘जैसे थे’ असल्याने नागरिकांमध्ये संताप व्यक्त केला जात आहे.

सनी निम्हण यांनी उपस्थित केलेले महत्त्वाचे मुद्दे:

• धोकादायक नियोजन: ड्रेनेजचे पाणी थेट रस्त्यावर पडणे हे केवळ खराब नियोजन नसून लोकांच्या जिवाशी खेळ आहे.

• पॅचवर्क नको, कायमस्वरूपी तोडगा हवा: दरवेळी तक्रार केल्यावर तात्पुरती मलमपट्टी (Patchwork) केली जाते. प्रशासनाने आता ठोस आणि कायमस्वरूपी उपाययोजना करावी.

• उत्तरदायित्व कोणाचे?: कोट्यवधींचा निधी खर्च होऊनही जर सामान्यांना त्रास सहन करावा लागत असेल, तर याला जबाबदार असणाऱ्या अधिकाऱ्यांवर कारवाई का होत नाही?

“सार्वजनिक सुरक्षितता हा पर्यायी विषय असू शकत नाही. पुणेकरांना दर्जेदार आणि सुरक्षित पायाभूत सुविधा मिळायलाच हव्यात. PMRDA ने आता चालढकल थांबवून तातडीने कामात सुधारणा करावी, अन्यथा जनआंदोलन छेडले जाईल.” — सनी निम्हण, नगरसेवक