बालेवाडी येथील मंत्रा मोनार्क सोसायटी मध्ये शिवजयंती उत्साहात साजरी…

बालेवाडी :

बालेवाडी येथील मंत्रा मोनार्क सोसायटीमध्ये छत्रपती शिवाजी महाराजांची जयंती मोठ्या उत्साहात आणि पारंपरिक पद्धतीने साजरी करण्यात आली. या सोहळ्यात सोसायटीतील लहान मुले, युवक, महिला तसेच ज्येष्ठ नागरिकांनी मोठ्या संख्येने सहभाग नोंदवला.

कार्यक्रमाची सुरुवात पारंपरिक वेशभूषा आणि फेटा परिधान करून काढण्यात आलेल्या भव्य मिरवणुकीने झाली. सोसायटीच्या स्वतःच्या ढोल-ताशांच्या पथकाच्या गजरात छत्रपती शिवाजी महाराज, राजमाता जिजाऊ, वीरांगना हिरकणी व मावळ्यांच्या वेशात साकारलेल्या प्रतिमांसह ‘भव्यदिव्य’ अशी शौर्यपूर्ण मिरवणूक काढण्यात आली. या मिरवणुकीमुळे संपूर्ण परिसरात शिवजयंतीचा उत्साह आणि शिवमय वातावरण निर्माण झाले होते.

या कार्यक्रमाला पुणे महानगरपालिकेचे नवनिर्वाचित नगरसेवक श्री बाबुराव आप्पा चांदेरे आणि श्री अमोल भैया बालवडकर यांनी प्रमुख उपस्थिती लावून कार्यक्रमाची शोभा वाढवली. उपस्थित मान्यवरांनी शिवचरित्रातून प्रेरणा घेऊन समाजात एकात्मता, शिस्त आणि देशभक्तीची भावना जोपासण्याचे आवाहन केले.

कार्यक्रमाच्या यशस्वी आयोजनाबद्दल मंत्रा मोनार्क सांस्कृतिक समूह आणि सर्व रहिवाशांचे विशेष कौतुक करण्यात आले. एकत्र येऊन साजरी केलेली ही शिवजयंती सोसायटीतील सामाजिक सलोखा आणि सांस्कृतिक जाणीव अधिक दृढ करणारी ठरली.