प्रभाग क्रमांक 9 मधील सोसायट्यामधील नागरिकांचा वाढता विश्वास; गणेश कळमकर यांच्या प्रचाराला जोर

बाणेर :

पुणे महानगरपालिका निवडणुकीच्या पार्श्वभूमीवर प्रभाग क्रमांक नऊचे भारतीय जनता पक्षाचे अधिकृत उमेदवार गणेश कळमकर यांनी बाणेर, बालेवाडी, पाषाण, सुतारवाडी, सुस आणि महाळुंगे परिसरातील विविध सोसायट्यांमध्ये प्रचार दौरा काढत नागरिकांशी थेट संवाद साधला.

या दौऱ्यादरम्यान गणेश कळमकर यांनी घरोघरी भेटी देत नागरिकांच्या समस्या, अपेक्षा आणि स्थानिक प्रश्न समजून घेतले. पाणीपुरवठा, रस्ते, वाहतूक, स्वच्छता, सुरक्षा तसेच मूलभूत सुविधांबाबत नागरिकांनी मांडलेल्या मुद्द्यांची त्यांनी सविस्तर नोंद घेतली. यासोबतच भाजपाच्या विकासाभिमुख धोरणांची आणि प्रभागाच्या सर्वांगीण विकासासाठी असलेल्या पक्षाच्या स्पष्ट व्हिजनची माहिती त्यांनी नागरिकांना दिली.

या वेळी नागरिकांनी दिलेला उत्स्फूर्त प्रतिसाद, आपुलकी आणि व्यक्त केलेला विश्वास हीच आपल्या पुढील कार्याची खरी प्रेरणा असल्याचे गणेश कळमकर यांनी सांगितले. “नागरिकांच्या सहभागातूनच सक्षम, सुरक्षित आणि विकासशील प्रभाग घडवण्याचा आमचा संकल्प आहे,” असे मत त्यांनी व्यक्त केले.

प्रचार दौऱ्यादरम्यान युवक, महिला, ज्येष्ठ नागरिक यांच्यासह विविध घटकांनी मोठ्या संख्येने सहभाग नोंदवला. एकूणच हा प्रचार दौरा सकारात्मक वातावरणात आणि उत्साहात पार पडला.