पुण्याचे माजी महापौर प्रशांत जगताप यांचा काँग्रेसमध्ये प्रवेश; संदीप बालवडकरही काँग्रेसमध्ये दाखल

पुणे :

पुण्याचे माजी महापौर प्रशांत जगताप यांनी राष्ट्रवादी काँग्रेस (शरदचंद्र पवार) पक्षातून बाहेर पडत आज अधिकृतपणे काँग्रेस पक्षात प्रवेश केला. त्यांच्या सोबत प्रभाग क्रमांक ९ मधील इच्छुक उमेदवार व त्यांचे खांदे समर्थक संदीप बालवडकर यांनीही काँग्रेसमध्ये प्रवेश केल्याने पुणे शहराच्या राजकारणात महत्त्वाची घडामोड घडली आहे.

हा पक्षप्रवेश काँग्रेसचे प्रदेशाध्यक्ष हर्षवर्धन सपकाळ आणि नेते विजय वडेट्टीवार यांच्या प्रमुख उपस्थितीत पार पडला. यावेळी काँग्रेस पक्षाच्या ध्येयधोरणांवर विश्वास ठेवून शहराच्या विकासासाठी नव्या जोमाने काम करण्याचा निर्धार प्रशांत जगताप आणि संदीप बालवडकर यांनी व्यक्त केला.

प्रवेशानंतर बोलताना संदीप बालवडकर म्हणाले, “पुणे महानगरपालिकेच्या येणाऱ्या निवडणुकीत काँग्रेस पक्ष अधिक ताकदीने मैदानात उतरेल. शहरातील नागरी समस्या, विकासाचे प्रश्न आणि नागरिकांच्या अपेक्षा यांना न्याय देण्यासाठी आम्ही अधिक जोमाने प्रचार करणार आहोत.”

या पक्षप्रवेशामुळे काँग्रेस पक्षाला पुणे शहरात नवसंजीवनी मिळाल्याचे चित्र असून, आगामी पुणे महानगरपालिका निवडणुकीच्या पार्श्वभूमीवर राजकीय समीकरणे बदलण्याची शक्यता वर्तवली जात आहे.