बाणेर येथील कळमकर विहीर अंजोर सोसायटी परिसरात दूषित पाणीपुरवठा रोखण्यासाठी नवी पाईपलाईन टाकली जाणार, ज्योती कळमकर यांच्या प्रयत्नांना यश…

बाणेर, पॅनकार्ड रोड :

कळमकर विहीर – अंजोर सोसायटी परिसरातील नागरिकांना गेल्या अनेक दिवसांपासून दूषित पाणीपुरवठ्याचा त्रास सहन करावा लागत होता. ड्रेनेज लाईनमधील पाणी पिण्याच्या पाण्यात मिसळत असल्याने नागरिकांचे आरोग्य धोक्यात आले होते. माजी नगरसेविका ज्योती कळमकर यांच्या प्रयत्नामुळे आता या समस्येवर कायमस्वरूपी उपाय होणार असून पुणे महानगरपालिका पाणीपुरवठा विभागाने नवीन लाईन टाकण्याची प्रक्रिया सुरु करण्याचा निर्णय घेतला आहे.

२५ वर्षे जुनी पाईपलाईन सिमेंट काँक्रेट रस्त्याखाली गेल्याने ती पूर्णपणे जीर्ण झाली होती. यामुळेच परिसरात दूषित पाणीपुरवठा होत होता. या संदर्भात माजी नगरसेविका ज्योती गणेश कळमकर यांनी महापालिकेकडे पाठपुरावा करून लेखी निवेदन दिले होते.

या निवेदनावर तात्काळ कार्यवाही करत पाणीपुरवठा विभागाचे मुख्य कार्यकारी अभियंता मा. श्री. नंदकुमार जगताप यांनी सकारात्मक प्रतिसाद दिला. “सदर भागातील जुन्या पाईपलाईनचा प्रश्‍न लक्षात घेऊन पुढील काही दिवसांत नवीन पाईपलाईन टाकली जाईल,” असे त्यांनी आश्वासन दिले आहे.

नवीन पाईपलाईन टाकल्यामुळे कळमकर विहीर व अंजोर सोसायटी परिसरातील नागरिकांना शुद्ध आणि स्वच्छ पाणीपुरवठा मिळणार आहे. यामुळे परिसरातील आरोग्यविषयक समस्या मोठ्या प्रमाणात कमी होतील, असा विश्वास नागरिकांनी व्यक्त केला आहे.