बालेवाडी वेल्फेअर फेडरेशनच्या वतीने ‘हरित बालेवाडी’ उपक्रम सुरूच; आतापर्यंत १२०० हून अधिक झाडांची लागवड

बालेवाडी :

बालेवाडी वेल्फेअर फेडरेशनने (Balewadi Welfare Federation) ‘हरित बालेवाडी’ (Harit Balewadi) हे उद्दिष्ट समोर ठेवून २०२१ पासून दरवर्षी पावसाळ्यात वृक्षारोपण मोहीम राबवली आहे. पुणे महापालिकेच्या उद्यान विभागाच्या सहकार्याने फेडरेशनने आतापर्यंत १२०० हून अधिक झाडे लावली असून, त्यापैकी जवळपास ८५० ते ९०० झाडे जगली आहेत. मैदाने, रस्त्यांच्या कडेला आणि उपलब्ध मोकळ्या जागांमध्ये झाडे लावून बालेवाडीला पुन्हा हिरवेगार करण्याचा हा प्रयत्न सुरू आहे.

जून २०२५ मध्ये पलक मार्ग परिसरात ५० झाडे लावून यावर्षीच्या वृक्षारोपण कार्यक्रमाची सुरुवात करण्यात आली. त्यानंतर, १० ऑगस्ट रोजी दसरा चौक ते लक्ष्मी माता मंदिराकडे जाणाऱ्या रस्त्यावरही ५० झाडे लावण्यात आली. या कार्यक्रमात फेडरेशनचे पदाधिकारी, कार्यकर्ते आणि स्थानिक नागरिक मोठ्या संख्येने उपस्थित होते.

हा उपक्रम यशस्वी करण्यासाठी मोरेश्वर बालवडकर, आशिष कोटमकर, दफेदार सिंह, ॲड. इंद्रजित कुलकर्णी, राजीव शहा, वैभव आढाव, अशोक नवाल, रमेश रोकडे, ॲड. माशाळकर, वंदना चौधरी, सुनील होवाळे, ललित पवार, डॉ. अजित धात्रक, गिरीश ढोबे, ओमप्रकाश वानखेडे आणि शकील सलाटी यांनी विशेष मेहनत घेतली.