*पेरीविंकल ग्रुप ऑफ इन्स्टिट्यूट्स मध्ये संस्कृतीचे रंग, भक्तीचा गंध अन् कल्पकतेची उधळण; पेरीविंकलमध्ये गणेशोत्सवाची मंगलमय सुरुवात!!!*

पुणे :

चैतन्य विद्या प्रतिष्ठान संचलित पेरीविंकल इंग्लिश मिडियम स्कूल अँड ज्युनिअर कॉलेजच्या बावधन , सूस, पिरंगूट, पौड, कोळवण, माले अशा विविध शाखांमध्ये गणेश चतुर्थीनिमित्त गणरायाचे भक्तिमय, उत्साहपूर्ण आणि पर्यावरणपूरक वातावरणात जल्लोषात आगमन झाले. विद्यार्थ्यांच्या उत्स्फूर्त सहभागातून गणेशोत्सवाची सुरुवात करण्यात आली. पारंपरिक संस्कृती, सर्जनशीलता, संघभावना, शिस्त आणि पर्यावरण संवर्धनाचा संदेश देत सर्व शाखांमध्ये गणरायाची विधिवत स्थापना करण्यात आली.
पेरीविंकलच्या विविध शाखांमध्ये यंदाच्या गणेशोत्सवानिमित्त स्वतंत्र आणि वैशिष्ट्यपूर्ण संकल्पनांवर आधारित आकर्षक देखावे साकारण्यात आले.

*प्रत्येक शाखेने भारतीय संस्कृती, अध्यात्म, निसर्ग आणि पर्यावरण संवर्धन यांचा सुंदर मिलाफ साधत विद्यार्थ्यांच्या कल्पकतेला आणि कलात्मकतेला व्यासपीठ उपलब्ध करून दिले.*

*बावधन शाखेत भगवान श्रीकृष्णाच्या बाललीला आणि वृंदावनाच्या रमणीय वातावरणाची अनुभूती देणारा सुंदर देखावा साकारण्यात आला. वृंदावनाचा निसर्गरम्य परिसर, गोवर्धन पर्वत, हिरवाई आणि श्रीकृष्णाच्या भक्तिमय विश्वाची झलक या देखाव्यातून अनुभवायला मिळाली. गोवर्धन पर्वताभोवतीची निसर्गरचना, आकर्षक सजावट आणि प्रकाशयोजनेच्या माध्यमातून संपूर्ण परिसराला आध्यात्मिक व प्रसन्न स्वरूप देण्यात आले. श्रीकृष्णाच्या गोवर्धन लीलेचा संदर्भ देणाऱ्या या देखाव्यातून संस्कृतीशी जोडलेले नाते आणि निसर्गाविषयीची आस्था अधोरेखित करण्यात आली.*

*सुस शाखेतील देखावा यंदाच्या गणेशोत्सवाचे विशेष आकर्षण ठरला.* विद्यार्थ्यांनी *वृंदावनातील प्रसिद्ध श्रीकृष्ण प्रेम मंदिराची हुबेहूब प्रतिकृती साकारली. मंदिराची भव्य रचना, कमानी, नक्षीकाम, प्रवेशद्वार तसेच सभोवतालची सजावट यांचा बारकाईने विचार करून ही प्रतिकृती तयार करण्यात आली.* *विशेष म्हणजे हा संपूर्ण देखावा साकारताना वर्तमानपत्राचा पुनर्वापर करण्यात आला.* टाकाऊ वर्तमानपत्रापासून विविध सजावटीच्या वस्तू, रचना आणि प्रतिकृतीतील अनेक घटक तयार करण्यात आले.

*हा अभिनव देखावा शिवराज सर यांच्या मार्गदर्शनाखाली विद्यार्थ्यांनी विशेष मेहनत आणि चिकाटीने साकारला. प्रत्येक छोट्या घटकाची निर्मिती, रंगकाम, सजावट आणि अंतिम मांडणी विद्यार्थ्यांनी उत्साहाने केली. त्यामुळे हा देखावा केवळ कलात्मक न राहता ‘टाकाऊपासून टिकाऊ’, पुनर्वापर आणि पर्यावरण संवर्धन यांचा प्रत्यक्ष संदेश देणारा ठरला. प्रेम, भक्ती, सौंदर्य आणि पर्यावरणपूरक विचारांचा सुंदर संगम या देखाव्यातून साधण्यात आला.*

*पिरंगुट शाखेत निसर्ग आणि पर्यावरण संवर्धन या संकल्पनेवर आधारित निसर्गरम्य देखावा साकारण्यात आला. हिरवाईने नटलेला परिसर, झाडे, वनस्पती, नैसर्गिक घटक आणि पर्यावरणाशी संबंधित विविध प्रतिकृती यांच्या माध्यमातून विद्यार्थ्यांनी निसर्गाचे महत्त्व अधोरेखित केले. वाढते प्रदूषण, निसर्गाचा ऱ्हास आणि पर्यावरण संवर्धनाची गरज याकडे लक्ष वेधत ‘निसर्ग वाचवा, पर्यावरण जपा’ हा संदेश प्रभावीपणे मांडण्यात आला. उपलब्ध साहित्याचा योग्य वापर आणि कल्पक सजावटीच्या माध्यमातून हा देखावा अधिक आकर्षक बनवण्यात आला.* विद्यार्थ्यांच्या कलात्मक कौशल्यासोबतच त्यांच्या पर्यावरणपूरक विचारसरणीचे दर्शन या देखाव्यातून घडले.

*पौड शाखेतील देखावा हा कोकणच्या मातीशी आणि संस्कृतीशी जोडणारा आगळावेगळा प्रयोग ठरला.*

*कोकणचे वैशिष्ट्य असलेल्या नारळाच्या माध्यमातून गणरायाचे रूप साकारण्यात आले. नारळाला गणरायाच्या रूपाशी जोडण्याची अभिनव कल्पना विद्यार्थ्यांच्या सर्जनशीलतेचे दर्शन घडवणारी ठरली.* कोकणातील नारळाची झाडे, ग्रामीण वातावरण, निसर्गरम्यता आणि पारंपरिक जीवनशैली यांची अनुभूती देणारी मांडणी करण्यात आली. या देखाव्यातून स्थानिक संस्कृतीचा सन्मान, निसर्गाशी असलेले नाते आणि उपलब्ध साधनांतून कलात्मक निर्मिती करण्याचा संदेश देण्यात आला.

गणरायाच्या स्वागतासाठी सर्व शाखांमध्ये प्रवेशद्वारांची आकर्षक सजावट करण्यात आली. गेट पूजन व स्वागताची व्यवस्था, फुलांची आरास, विविध रंगांची सुंदर रांगोळी, फलक सजावट तसेच गणेशोत्सवाला अनुरूप सजावट करण्यात आली. विद्यार्थ्यांच्या लेझीम पथकाने पारंपरिक वादनातून गणरायाचे जल्लोषात स्वागत केले. ‘गणपती बाप्पा मोरया’च्या जयघोषाने संपूर्ण शाळा परिसर दुमदुमून गेला.

यानंतर गणरायाची विधिवत स्थापना व पूजन करण्यात आले. विद्यार्थी आणि शिक्षकांनी भक्तिभावाने आरती केली. गणरायाच्या आगमनामुळे शाळेच्या परिसरात आनंद, उत्साह, भक्ती आणि सकारात्मक ऊर्जेचे वातावरण निर्माण झाले.

कार्यक्रमाच्या यशस्वी आयोजनासाठी प्रवेशद्वार सजावट व पूजन, लेझीम पथकाचे नियोजन, रांगोळी निर्मिती, फलक सजावट, गणपती स्थापना, आकर्षक देखावे तयार करणे, शाळेची सजावट, ध्वनिव्यवस्था, छायाचित्रण आणि वृत्तलेखन अशा विविध जबाबदाऱ्या नियोजनबद्ध पद्धतीने पार पाडण्यात आल्या. सर्व शिक्षक, शिक्षकेतर कर्मचारी आणि विद्यार्थ्यांनी या उपक्रमात उत्स्फूर्त सहभाग घेतला.

या उपक्रमातून विद्यार्थ्यांना भारतीय संस्कृती व परंपरांची ओळख, संघभावना, शिस्त, सहकार्य, सर्जनशीलता आणि कलात्मकतेचे महत्त्व समजले. विशेषतः विविध शाखांमध्ये साकारण्यात आलेल्या देखाव्यांमधून विद्यार्थ्यांनी पर्यावरण संवर्धन, पुनर्वापर, स्थानिक संस्कृती आणि भारतीय परंपरा यांचा सुंदर समन्वय साधला. गणेशोत्सवाच्या माध्यमातून विद्यार्थ्यांच्या कलागुणांना, कल्पनाशक्तीला आणि सामाजिक-पर्यावरणीय जाणिवांना सुंदर व्यासपीठ मिळाले.

संपूर्ण उपक्रमाचे आयोजन संस्थेचे अध्यक्ष श्री. राजेंद्र बांदल, डायरेक्टर सौ. रेखा बांदल, शिवानी बांदल तसेच प्रमुख प्राचार्या सौ. निर्मल पंडित यांच्या अध्यक्षतेखाली प्रत्येक शाखेचे मुख्याध्यापक निर्मल पंडित, वीणा कदम आणि इनायत मुजावर यांच्या मार्गदर्शनाखाली उपमुख्याध्यापिका सौ. योगिता ढाणे, पर्यवेक्षिका सायली गायकवाड,शिरीन काझी, सचिन खोडके, नेहा माळवदे, सना इनामदार, पल्लवी नारखेडे, रुपाली गर्ग आणि नेत्रा काकडे यांच्या सहकार्याने तसेच सर्व शिक्षकवृंद आणि शिक्षकेतर कर्मचारी यांच्या मदतीने करण्यात आले होते.

सर्व शाखांतील शिक्षक, शिक्षकेतर कर्मचारी आणि विद्यार्थ्यांच्या सामूहिक प्रयत्नांमुळे पेरीविंकल परिवारात गणरायाचे आगमन भक्तिमय, शिस्तबद्ध आणि आनंददायी वातावरणात संपन्न झाले. बावधनमधील वृंदावन व गोवर्धन पर्वत, सुसमधील वृंदावनातील श्रीकृष्ण प्रेम मंदिर, पिरंगुटमधील निसर्गरम्य पर्यावरणपूरक देखावा आणि पौडमधील कोकणच्या नारळातून साकारलेले गणरायाचे रूप यामुळे यंदाच्या गणेशोत्सवाची सुरुवात संस्मरणीय ठरली. विद्यार्थ्यांच्या सर्जनशीलतेचा, संस्कृतीप्रेमाचा आणि पर्यावरण संवर्धनाच्या जाणीवेचा हा सुंदर आविष्कार ठरला.