पुण्यातील पाषाण येथे भाजपा सरकारला पुणेरी टोमणा; अमित शहा यांच्या दौऱ्यादरम्यान पाषाण रोडवर झळकले बॅनर्स

पाषाण :

केंद्रीय गृहमंत्री अमित शहा यांच्या पुणे दौऱ्यादरम्यान पाषाण रोड परिसरात सरकारला लक्ष्य करणारे पुणेरी टोमणे असलेले बॅनर्स झळकल्याने पाषाण परिसरात त्याची जोरदार चर्चा सुरू झाली आहे.

या बॅनरवर “तुमचं ते लेकरू… आमचं ते कार्ट…” असा उपरोधिक मजकूर झळकवण्यात आला आहे. बॅनरमध्ये एका बाजूला मंत्र्यांची मुले सुखी आणि सुरक्षित आयुष्याबाबत चर्चा करत असल्याचे चित्रण करण्यात आले असून, दुसऱ्या बाजूला जंतर-मंतर येथे विद्यार्थ्यांवर झालेल्या कथित पोलिस लाठीचार्जचे छायाचित्र वापरण्यात आले आहे. या माध्यमातून सत्ताधारी आणि सामान्य नागरिकांच्या मुलांमधील वागणुकीतील कथित दुहेरी निकषांवर भाष्य करण्याचा प्रयत्न करण्यात आला आहे.

केंद्रीय गृहमंत्री अमित शहा यांच्या दौऱ्याच्या पार्श्वभूमीवर हे बॅनर्स लावण्यात आल्याने त्याची राजकीय व सामाजिक स्तरावर चर्चा रंगली आहे.

ही बॅनर्स पाषाण येथील सामाजिक कार्यकर्ते समीर उत्तरकर यांच्या वतीने लावण्यात आल्याची माहिती समोर आली आहे.