जागतिक महिला दिनानिमित्त बाणेर-बालेवाडीत महिला सफाई कामगारांचा सन्मान, राजाभाऊ गुडदे फाउंडेशनचा उपक्रम..

बालेवाडी :

जागतिक महिला दिनानिमित्त राजाभाऊ गुडदे फाउंडेशनच्या वतीने बाणेर-बालेवाडी परिसरातील रस्ते साफसफाई करणाऱ्या महिला सफाई कामगारांचा सन्मान करण्यात आला. शहर स्वच्छ ठेवण्यासाठी दररोज परिश्रम घेणाऱ्या या महिलांच्या कार्याचा गौरव करण्याच्या उद्देशाने हा उपक्रम आयोजित करण्यात आला होता.

यावेळी महिला कामगारांना साडी, चॉकलेट आणि गुलाबाचे फूल देऊन त्यांचा सत्कार करण्यात आला. त्यांच्या मेहनतीबद्दल कृतज्ञता व्यक्त करत समाजातील अशा कष्टकरी घटकांच्या योगदानाची दखल घेणे आवश्यक असल्याचे यावेळी आयोजकांनी सांगितले.

दररोज शहर स्वच्छ आणि सुंदर ठेवण्यासाठी महिला सफाई कामगार महत्त्वाची भूमिका बजावत असतात. त्यांच्या या कार्याला प्रोत्साहन देण्यासाठी आणि त्यांचा सन्मान करण्यासाठी फाउंडेशनतर्फे हा उपक्रम राबविण्यात आला असल्याचेही यावेळी सांगण्यात आले.

सन्मानाबद्दल उपस्थित महिला कामगारांनी आनंद व्यक्त करत राजाभाऊ गुडदे फाउंडेशनचे आभार मानले.