सुस–बाणेर–पाषाण प्रभाग ९ ब मधून अपक्ष उमेदवार प्रमोद निम्हण यांना ‘शिट्टी’ चिन्ह..

पाषाण :

सुस–बाणेर–पाषाण प्रभाग क्रमांक ९ ब मध्ये नागरिकांच्या नाराजीचा आवाज आता थेट निवडणूक रिंगणात उमटताना दिसत असून, माजी नगरसेवक प्रमोद निम्हण यांना अपक्ष उमेदवार म्हणून “शिट्टी” हे निवडणूक चिन्ह मिळाले आहे.

राष्ट्रवादी काँग्रेसकडून उमेदवारी नाकारण्यात आल्यानंतर पाषाण, सुतारवाडी व सोमेश्वरवाडी परिसरात तीव्र असंतोष पसरला होता. याच असंतोषातून निर्धार सभा घेण्यात आली, तर पाषाण ग्रामस्थांनी पाषाण बंद पुकारत आपली भूमिका ठामपणे मांडली होती.

या जनभावनेच्या पार्श्वभूमीवर प्रमोद निम्हण यांनी अपक्ष उमेदवारी स्वीकारल्याने प्रभागातील निवडणूक अधिकच लक्षवेधी ठरणार आहे. अधिकृत चिन्ह मिळाल्यानंतर आता प्रचाराला वेग येणार असून, नागरिक कोणाच्या बाजूने कौल देतात याकडे सर्वांचे लक्ष लागले आहे.